ନୂଆଦିଲ୍ଲୀ, : ଅପରେସନ ସିନ୍ଦୂରକୁ ନେଇ ଭାରତୀୟ ସେନାର ଅଭିଯାନ ଉପରେ ଶୁକ୍ରବାର ସନ୍ଧ୍ର୍ୟା ୫.୩୦ମିନିଟରେ ସ୍ପେଶାଲ ବ୍ରିଫିଂ ହୋଇଛି । ଯେଉଁଥିରେ ପାକିସ୍ତାନର ମନ୍ଦ ଷଡ଼ଯନ୍ତ୍ରର ସତ୍ୟ ଭାରତୀୟ ଅଧିକାରୀ କହିଛନ୍ତି । ଏହି ପ୍ରେସ ମିଟରେ ଭାରତର ବିଦେଶ ସଚିବ ବିକ୍ରମ ମିଶରୀ, କର୍ଣ୍ଣଲ ସୋଫିଆ କୁରେଶୀ ଏବଂ ୱିଙ୍ଗ କମାଣ୍ଡର ବ୍ୟୋମିକା ସିଂହ ପାକିସ୍ତାନର ଏହି ଷଡ଼ଯନ୍ତ୍ର ଏବଂ ତା\’ ପରେ ଭାରତର ଜବାବୀ କାର୍ଯ୍ୟାନୁଷ୍ଠାନର ସୂଚନା ଦେଇଛନ୍ତି । ଭାରତ ଏବଂ ପାକିସ୍ତାନ ଉତ୍ତେଜନା ମଧ୍ୟରେ ବିଦେଶ ମନ୍ତ୍ରଣାଳୟର ଏହା ଲଗାତର ଭାବେ ତୃତୀୟ ପ୍ରେସମିଟ୍ । ଏହା ପୂର୍ବରୁ ୭ ଏବଂ ୮ମଇରେ ବି ସରକାରଙ୍କ ତରଫରୁ ଅପରେସନ ସିନ୍ଦୂରର ସୂଚନା ଦିଆଯାଇଥିଲା । ସୋଫିଆ କୁରେଶୀ କହିଛନ୍ତି, ୮-୯ ମଇ ମଧ୍ୟ ରାତ୍ରିରେ ସାମରିକ ଭିତ୍ତିଭୂମିକୁ ଟାର୍ଗେଟ କରିବା ପାଇଁ ଭାରତୀୟ ବାୟୁ ସୀମା ଉଲ୍ଲଂଘନ କରାଯାଇଥିଲା । ଅନ୍ତର୍ଜାତୀୟ ସୀମା ଲେହରୁ ସର କ୍ରିକ ପର୍ଯ୍ୟନ୍ତ ୩୬ଟି ସ୍ଥାନରେ ଆକ୍ରମଣ କରାଯାଇଥିଲା । ଭାରତୀୟ ସୈନ୍ୟ ବାହିନୀ ଏହି ଡ୍ରୋନଗୁଡ଼ିକ ମଧ୍ୟରୁ ଅନେକକୁ ଖସାଇ ଦେଇଛନ୍ତି । ସେହିଭଳି କର୍ଣ୍ଣେଲ କୁରେଶୀ କହିଛନ୍ତି ଯେ ଅନ୍ତର୍ଜାତୀୟ ସୀମା ଏବଂ ନିୟନ୍ତ୍ରଣ ରେଖାର ୩୬ଟି ସ୍ଥାନରେ ଅନୁପ୍ରବେଶ ପାଇଁ ୩୦୦-୪୦୦ଡ୍ରୋନ ବ୍ୟବହାର କରାଯାଇଥିଲା । ଭାରତ ଏହି ଡ୍ରୋନ ଗୁଡ଼ିକ ମଧ୍ୟରୁ ଅନେକକୁ ଖସାଇ ଦେଇଛି । ସେମାନଙ୍କର ଲକ୍ଷ୍ୟ ଥିଲା ବାୟୁ ପ୍ରତିରକ୍ଷା ପ୍ରଣାଳୀ ବିଷୟରେ ଗୁଇନ୍ଦା ସୂଚନା ସଂଗ୍ରହ କରିବା । ଏ ଗୁଡ଼ିକ ତୁର୍କୀର ଡ୍ରୋନ ଥିଲା । ତା\’ର ତଦନ୍ତ କରାଯାଉଛି । ସେଠାରେ ଏକ ୟୁଏଭି ମଧ୍ୟ ଥିଲା, ଯାହାକୁ ନିଷ୍କ୍ରିୟ କରାଯାଇଥିଲା । ପ୍ରାଥମିକ ତଦନ୍ତରୁ ଜଣାପଡିଛି ଯେ ଏ ଗୁଡ଼ିକ ସମସ୍ତ ତୁର୍କୀ ଡ୍ରୋନ୍ ଥିଲା । ସୀମାରେ ମଧ୍ୟ ଗୁଳିଚାଳନା ହୋଇଥିଲା । ଏଥିରେ କିଛି ଭାରତୀୟ ସୈନିକ ଆହତ ହୋଇଥିଲେ । ପାକିସ୍ତାନରେ ମଧ୍ୟ ବହୁତ କ୍ଷତି ହୋଇଛି । ଏହା ପୂର୍ବରୁ ଗୁରୁବାର ଏକ ସାମ୍ବାଦିକ ସମ୍ମିଳନୀରେ ଭାରତୀୟ ଅଧିକାରୀମାନେ କହିଥିଲେ ଯେ ପାକିସ୍ତାନର ସମ୍ପ୍ରତି ଆକ୍ରମଣାତ୍ମକ କାର୍ଯ୍ୟାନୁଷ୍ଠାନର ଏକ ସଂଯମ, କେନ୍ଦ୍ରିତ ଏବଂ ସଠିକ୍ ଜବାବ ଦିଆଯାଇଛି । ୱିଙ୍ଗ କମାଣ୍ଡର ବ୍ୟୋମିକା ସିଂହ କହିଛନ୍ତି, ପାକିସ୍ତାନ ଏଲଓସିରେ ପ୍ରବଳ ଗୁଳିମାଡ଼ କରିଛି, ଯେଉଁଥିରେ କିଛି ସୈନିକ ଆହତ ହୋଇଛନ୍ତି । ୭ ମଇ, ୨୦୨୫ରେ ରାତି ୮:୩୦ରେ ଏକ କ୍ଷେପଣାସ୍ତ୍ର ଏବଂ ଡ୍ରୋନ୍ ଆକ୍ରମଣ କରାଯାଇଥିଲା ଏବଂ ସେହି ସମୟ ମଧ୍ୟରେ ଆକାଶପଥ ବନ୍ଦ ହୋଇନଥିଲା । ସାଧାରଣ ନାଗରିକମାନଙ୍କୁ ଢାଲ ଭାବରେ ବ୍ୟବହାର କରାଯାଉଥିଲା । କୁହାଯାଇଥିଲା କି, ପଞ୍ଜାବ ସେକ୍ଟରରେ ହାଇ ଏୟାର ଡିଫେନ୍ସ ଆଲର୍ଟ ସମୟରେ, ଆମର ଏୟାରସ୍ପେସ ବେସାମରିକ ବିମାନ ପାଇଁ ବନ୍ଦ ଅଛି, କିନ୍ତୁ ଏକ ବେସାମରିକ ବିମାନ ପାକିସ୍ତାନର ଅଞ୍ଚଳରେ ଚଳାଚଳ କରୁଥିଲା । ଭାରତୀୟ ବାୟୁସେନା ଏହାର ପ୍ରତିକ୍ରିୟାରେ ସଂଯମତା ଦେଖାଇଲା ଏବଂ ଅନ୍ତର୍ଜାତୀୟ ବେସାମରିକ ବିମାନ ସେବାର ସୁରକ୍ଷା ସୁନିଶ୍ଚିତ କଲା । ବୈଦେଶିକ ସଚିବ ବିକ୍ରମ ମିଶରୀ କହିଛନ୍ତି ଯେ, ପାକିସ୍ତାନ ଦ୍ୱାରା ଉତ୍ତେଜନାମୂଳକ କାର୍ଯ୍ୟ ନିଆଯାଇଥିଲା, ସେମାନେ ଭାରତୀୟ ସହର ଏବଂ ବେସାମରିକ ଭିତ୍ତିଭୂମି ଏବଂ କିଛି ସାମରିକ ପ୍ରତିଷ୍ଠାନକୁ ଟାର୍ଗେଟ କରିଥିଲେ । ଭାରତୀୟ ସାମରିକ ୟୁନିଟଗୁଡ଼ିକ ଏହାର ଜବାବ ଦେଇଥିଲେ । ସେ ଆହୁରି କହିଛନ୍ତି ଯେ ପାକିସ୍ତାନ ଦାବି କରୁଛି ଯେ ସେମାନେ କୌଣସି ଧାର୍ମିକ ସ୍ଥଳ ଉପରେ ଆକ୍ରମଣ କରିନାହାଁନ୍ତି । ମାତ୍ର ବାସ୍ତବତା ହେଉଛି ସେମାନେ ପୁଞ୍ଝର ଗୁରୁଦ୍ୱାର ଉପରେ ଆକ୍ରମଣ କରିଥିଲେ । ଏହି ଆକ୍ରମଣର ଦାୟିତ୍ୱ ନେବା ପରିବର୍ତ୍ତେ, ପାକିସ୍ତାନ କହୁଛି ଯେ ଭାରତୀୟ ସେନା ଏହା କରୁଛି । ଗୁରୁଦ୍ୱାର ଉପରେ ହୋଇଥିବା ଆକ୍ରମଣରେ କିଛି ଶିଖ ସଦସ୍ୟଙ୍କ ମଧ୍ୟ ମୃତ୍ୟୁ ହୋଇଛି । ପାକିସ୍ତାନ କହୁଛି ଯେ ଆମେ ଆମ ନିଜ ସହର ଉପରେ ଆକ୍ରମଣ କରୁଛୁ, ଏହା କେବଳ କଳ୍ପନା ।
